'

【英超】越位波冇畫線?阿仙奴畀賓福特迫和 鬥曼城前又失分;同一VAR球證有前科

阿仙奴主場被賓福特迫和1比1,不過今次某程度上係死於VAR球證手上,仲要係雙重越位爭議,的確唔抵。阿仙奴依家同曼城都係21戰,阿仙奴多6分,嚟緊周四凌晨,榜首雙雄就會展開榜首生死戰。

上仗作客不敵愛華頓,令阿仙奴鋭氣受挫,今仗回師主場,阿迪達繼續用勝利11人,表現亦未復高峰,但去到66分鐘,總算能打開紀錄,上個月由白禮頓轉會嘅李安度杜沙特,射入加盟阿仙奴後首個入球。

但8分鐘後,出現極具爭議性嘅一幕,賓福特罰球,造成門前混戰,中鋒艾雲東尼頂成1比1;處於越位位置嘅賓諾克,入波過程中有阻擋對手中堅,但VAR球證Lee Mason認為未有影響球賽,維持判入球有效。

呢個判決已有爭議性,而其實洛加特喺入波過程中,隨後助攻嗰一刻,同樣明顯突出咗,但VAR竟然冇劃線……

比賽期間,身處VAR房嘅英國職業裁判員公司(PGMOL)代表Chris Foy,向《每日郵報》證實烏龍事件:「VAR當時睇緊賓諾克有冇越位、有冇阻擋對手,最後認為冇問題。但洛加特送出助攻有冇越位,Mason只係好快咁睇完而冇畫線,如果有畫線,呢球一定係越位,呢一件事的確係人為錯誤。」

VAR球證Lee Mason今季已有2次判決,被PGMOL證實為錯判,一度被罰停賽,2次錯判當中,包括阿仙奴今季首場敗仗,亦即作客對曼聯嗰場波,加比爾馬天尼利入球被作廢。

至於阿仙奴死敵熱刺就更大鑊,上周擊敗曼城,益晒阿仙奴,但呢班真正海鮮波,今輪又再慘敗,1比4不敵李斯特城,未能追近第4位嘅紐卡素。

除崩潰式慘敗,中場主力賓坦古亞因膝傷出場,令熱刺兵源進入紅色警戒線!洛里斯、比蘇馬重傷有排抖,賴恩施斯隆休息6星期,對爭前4將有極大影響;周中歐聯16強首回合對AC米蘭,仲有中場大將賀積查治停賽,情況相當唔樂觀。