股票市場大起大落，波都一樣，代表球隊就梗係利物浦，上仗締造歷史性勝仗，7蛋送紅魔，但相隔唔夠一星期，竟然作客0比1負榜尾分子般尼茅夫，認真吹漲。
點解不斷反覆又反覆，又由龍變蟲，相信領隊高普都答你唔到。成隊踢得唔好係事實，加上沙拿12碼宴客，令利物浦未能趕過熱刺，仍然排喺第5位。表現欠缺穩定，經常遇弱失分，係紅軍爭取下季歐聯入場券嘅死穴。
利迷日夜期盼，新三叉㦸終於發揮威力，將紅魔防線徹底撕碎 ; 好勢頭、冇保留，沙拿、達雲紐尼斯及加普今仗繼續正選登場，領隊高普寄望三人保持威力，除追逐前4，周中歐聯作客皇馬，雖然首回合落後3球，仍希望盡力而為，創造近乎不可能嘅奇跡。
般茅賽前同愛華頓、列斯聯並列倒數第2，但並非不堪一擊，上仗作客榜首阿仙奴，曾經領先兩球，直至97分鐘先至反輸2比3。時隔一周再戰班霸，士氣絲毫無損，初段頂住強攻，並開始策動反攻。
28分鐘，利物浦全軍壓上，中堅雲迪積克最後一個已經係企喺中場線，後場完全空洞，般茅得球後直傳快攻，哥達拉右路快放，推過VVD同羅拔臣傳中，干拿迪未能解圍，阿諾特亦包唔切位，畀菲臘標寧近門撞入。
換邊後高普打少個中場，以祖達入替艾利洛增強攻力，但面對般茅密集硬朗防守，新三叉㦸冇晒符，同對曼聯時簡直係天與地，中場支援策動亦好疲弱。
68分鐘出現黃金機會，對方防守高空攻勢時手部觸球，利物浦得到幸運12碼，但沙拿未能把握機會，射斜出界。難得餐士都白白錯失，整定利物浦爆大冷3分盡失，重演數年前超級海鮮波嘅特性。
