【英超】走出連敗陰影!2:0勝狼隊 阿仙奴創作客紀錄;奧隊參與士哥 全英超第3

阿仙奴重登榜首!周日凌晨英超,阿仙奴終於走出連輸兩場嘅小低潮,作客以2:0擊敗狼隊,由於曼城要出戰足總盃,阿仙奴因此喺踢多場嘅情況下,以1分反壓曼城,升上榜首。

同時,連埋今場淨勝狼隊兩粒,阿仙奴連續6場聯賽作客零封對手,期間入22球,創下球會紀錄。

阿仙奴今場陣容稍作調整,加比爾捷西斯正選踢9號位,薩卡、托沙雙翼支援,夏維斯踢番中場,同迪勤懷斯、奧迪加特拍檔。

連輸兩場,英超爭標變被動、周中歐聯出埋局,阿仙奴士氣肯定受打擊,今場初段表現水準以下,狼隊祖奧高美斯更曾射中楣。大難不死嘅阿仙奴,去到臨完半場前搵到缺口,捷西斯喺混戰中助攻,托沙射入,半場領先狼隊1:0。

換邊後,雙方都冇太多攻勢,補時階段,阿仙奴隊長奧迪加特殺入禁區,喺窄位連環施射、鎖定2:0勝局。阿仙奴目前33戰74分,以1分、3分領先踢少場嘅曼城及利物浦。

今場為阿仙奴鎖定勝局嘅奧迪加特,自2021年英超處子戰以來,已經參與球隊50個英超士哥,位列同期嘅英超中場第3,前兩名係迪布尼(60球)及般奴費南迪斯(58球)。