【英超】贏曼城阿仙奴 搞唔掂錫菲聯;維拉錯失25年再登榜首機會 艾美利鼓勵手足:為你哋自豪

世事難料,阿士東維拉主場15連勝終結,對手竟然係榜尾球隊錫菲聯!周六凌晨英超,維拉被倒戈嘅青訓產品甘馬倫艾查入波,主場僅以1:1逼和錫菲聯,錯過相隔25年後再登榜首嘅機會。

維拉上半場一如賽前預料,憑超高強度壓迫取得大部份控球權,可惜真正有威脅嘅攻門唔算多,雙方半場互無紀錄。59分鐘,維拉憑角球製造亂局,里安拜利遠柱射入,但積及藍斯被判侵犯門將在先,慘食詐胡。

呢場波去到87分鐘掀起高潮,錫菲聯咸馬接應快開罰球,然後盤扭傳中,由艾查射入,以為絕殺之際,戰至補時7分鐘,辛尼奧路快門將一步頂入,幫維拉執番1分。

維拉主場一向惡到爆,早前阿仙奴、曼城都葬身維拉公園球場,今仗對倒數第2嘅錫菲聯,以為實食冇黐牙,點知反而幾乎輸波,15連勝就此終結,真係估佢唔到。

雖然錯過咗25年後聯賽再登頂嘅機會,但維拉仍以18場39分升上次席,阿仙奴則以較佳球差排榜首,利物浦38分排第3。阿仙奴周日凌晨會作客利物浦,上演榜首大戰。

維拉當紅領隊艾美利,賽後仍讚班球員好努力,但就對VAR有啲微言:「我好開心,為球員自豪。大家要知道延續勝利紀錄係非常困難,而且人哋防守真係好出色。」

艾美利繼續話:「雖然係咁,我都一直接受VAR呢件事,但今日佢哋嘅介入未免太多,上半場根本冇必要翻睇兩三次,至於嗰個入球,更加係不必要介入,因為大家都會接受呢個入球。」