冠軍球隊要具備嘅基本條件，係要有一級主帥，阿迪達尋晚再一次顯示佢嘅能力、機智、風度同器量，已經達到一流水平。
北倫敦打吡，阿仙奴作客以2:0擊敗死敵熱刺，李察利臣非常惹火，熱刺球迷更襲擊阿仙奴門神蘭斯達爾，賽後幾乎爆發衝突，好彩阿迪達冷靜醒目，立即衝入場拉走同熱刺球員鬧緊交嘅沙加同蘭斯達爾，廢事佢哋同人開拖，除咗禁賽，最重要嘅係避免受傷。
阿仙奴今場反客為主，14分鐘，薩卡仔右路傳中，熱刺門將洛里斯將個波擋入自己龍，阿仙奴領先1:0。兵工廠得勢不饒人，領先後繼續狂攻，36分鐘，奧迪加特冷箭得手，半場阿仙奴領先2比0。
下半場熱刺大反撲，不過阿仙奴門神蘭斯達爾超神勇，作出7次撲救，協助阿仙奴力保勝局。
極級惹火嘅李察利臣，疑不滿蘭斯達爾喺佢面前慶祝，突然出手推人、引爆衝突，蘭斯達爾彎腰執手套，一名熱刺球迷更衝落場踢背脊，好彩保安即刻拉開施襲者，而達Sir亦衝入場內，保護同拉走蘭斯達爾。
拉走完蘭斯達爾，又輪到沙加想幫隊友報仇，阿迪達知佢係火爆底，於是又立即狂奔拉走埋沙加，廢事佢因為同人開拖而受傷或停賽。
英格蘭足總、熱刺均發聲明，話會透過閉路電視同警方追緝施襲球迷，熱刺亦強調，會終身禁止施襲者入場。
阿仙奴贏波後，喺聯賽榜拋甩次席曼城8分，目前踢咗7場「倫敦打吡」，阿仙奴全部贏晒。兵工廠主帥阿迪達，賽後極有大將之風，幫手化解衝突：「我睇唔到發生咩事，我只係睇到一場好好睇嘅足球比賽。」
