無緣世界盃，化失望為動力，中鋒艾雲東尼梅開二度，賓福特爆冷作客2:1挫曼城，今季成為曼市雙雄尅星。
賓福特季初曾以4:0大勝曼聯，今仗再贏曼城，球會歷史上第3次一季內同時擊敗曼市雙雄，之前已追溯至1936-37及1937-38年球季。
曼城今季第2次落敗，球員有疲態、推進亦冇以往順暢，哥迪奧拿賽後承認，賓福特值得取勝，除防守夠深度，高Q大棍踢法收效，令曼城防線未能制止攻勢。
高大中鋒艾雲東尼今季表現不俗，曾有入選英格蘭世界盃大軍嘅機會，可惜最終榜上無名，疊埋心水砌英超，開波16分鐘，即以身材優勢，頭槌破網開紀錄。
曼城上半場完結前，由菲爾科頓勁射扳平，但之後火力失靈，奇雲迪布尼、艾寧夏蘭特未如之前般極有威脅，反而賓福特反擊更堅，去到補時8分鐘，乘曼城空群搶攻，展開超高速快攻，最後由艾雲東尼近門撞入，贏2:1完場。
賽後艾雲東尼喺IG出po，張相係自己慶祝，用兩隻手指掩住耳仔，被外界認為係向修夫基示威。因傷落選英格蘭嘅右閘列斯占士，就引用摩佬金句、現已成為著名meme圖嘅“if I speak i’m in big trouble”嚟回應，至於同樣落選嘅中鋒譚美阿巴謙，亦用咗一個emoji嚟回應，唔敢多加comment。
英超完成今輪賽事後將休戰，到12月26號重開，英聯盃第4圈更會早於20號舉行，距離世界盃決賽只有3日距離，到時會有曼城對利物浦。哥迪奧拿對超頻密賽程，無奈到只能自嘲：「到時可能要踢中場，高普打後衞，打完世界盃，唔知仲有幾多球員可以用。」
至於稍後時間出擊嘅利物浦，主場3:1挫修咸頓，達雲紐尼斯打番場好波，梅開二度，另一球來自法明奴。
世界盃大軍名單已公布，仲有一輪英超，有冇球員出事？李斯特城雖然2:0挫韋斯咸，但剛入選英格蘭國家隊中場占士麥迪臣，上半場被換出，好彩之後李城領隊羅渣士話麥迪臣無大礙，可如期出戰世界盃。
