【英超】誇張!xG7.27球!利物浦4:2炒紐記 沙拿創造3球;高普:今場係反逼搶教材

超誇張!利物浦火力全開,憑沙拿兩射一傳,今晨以4:2輾壓紐卡素,紅軍全場射門多達34次,當中15次射正,xG更多達7.27球!

有睇開數據嘅朋友,都知道xG(預期入球)係咩概念,7.27球除咗係一個極度誇張嘅數字,亦係英超有統計(2010年)以來嘅最高紀錄,而利物浦上季9:0血洗般尼茅夫,xG都係得3.32球。

利物浦今場xG高達7.27球!

不過喺瘋狂進襲嘅背後亦不無隱憂,雖然紐卡素門神杜巴夫卡屢有神救,但紅軍把握力亦急需改善,尤其係沙拿踢完今仗,就會飛返國家隊報到,出戰非國盃。

沙拿有幾重要?呢位32歲鋒將今場入兩球加一個助攻,理所當然成為MOTM,總計今季英超20次披甲,射入14球,送出8次助攻,喺射手榜同助攻榜都係排第一,至於創造重大機會次數,沙拿亦以17次居首,阿諾、孫興民分別為12次同11次,可想而知利物浦冇咗沙拿,打擊會有幾大。

沙拿踢埋今場,就會離隊轉戰非國盃。

利物浦領隊高普話:「呢場比賽嘅氣氛真係好正!我哋有時選擇強行射門,亦有把握欠佳嘅時候,我哋自己同紐卡素門將杜巴夫卡(神救),確保今場比分唔會太誇張。點都好,今場我哋表現好出色,尤其反逼搶更加係教材,草根球隊多睇幾次呢場波,應該會有得著!」

今場係2024年英超第一場賽事,利物浦一開波就係威係勢,早段迪亞斯食詐糊、沙拿12碼宴客,上半場0:0。換邊後利物浦嚟料,49分鐘,沙拿近門掃入打開紀錄,5分鐘後,紐卡素由伊沙克扳平。

機會極多嘅紅軍繼續狂攻,74分鐘,居迪斯鍾斯近門射入,4分鐘後,沙拿手術刀式腳趾尾拉西,加普完成任務。81分鐘,保治文頭槌幫紐卡素追成2:3,但利物浦繼續施襲,祖達博到12碼,沙拿再次操刀中鵠,利物浦贏4:2完場。目前利物浦20戰45分,領先次席維拉3分、拋甩曼城及阿仙奴5分。