【英超】複製朗尼12年前經典倒掛 加C朗招牌慶祝動作;19歲加拿祖 預定今季英超金球

朗尼式倒掛金球,加上C朗嘅慶祝入球動作,曼聯周一凌晨作客3比0大勝愛華頓,加拿祖成為全場焦點人物。

開波只有3分鐘,加拿祖踏順步韻,球不著地倒掛金鉤,用超靚倒掛為曼聯打開紀錄,19歲嘅加拿祖話,呢個係佢人生最靚嘅入波之一:「講真,入完波後,我只係諗呢球真係有啲難以置信、好靚,至於會唔會成為英超今季最佳金球,或者啦,依家先11月,不過我都認為係嘅,哈哈。」

曼聯領隊坦哈格,亦撐呢球波係今季最佳金球:「唔淨止係射門嗰一刻,就連喺準備嗰陣亦盡顯功架,的確入得太妙喇!」

雖然3分鐘就取得領先優勢,但入波後嘅曼聯,整個上半場被愛華頓狂攻,要去到下半場先靠拉舒福特12碼、同埋馬迪爾增添紀錄。坦哈格自爆佢半場嗰陣喪鬧班球員:「依家啲比賽隨時都踢100分鐘,我哋要保持專注,好彩佢哋下半場就做得好好,3名進攻球員分別入波,呢啲先係我哋想要嘅嘢。」

加拿祖這球靚倒掛,同朗尼12年前對曼城嗰球波好相似,當年嗰個入球,當季就被票選為聯賽史上最佳金球。加拿祖除咗複製朗尼經典,慶祝入波時,就用C朗「Siu」嘅慶祝動作,一次過向兩位曼聯名宿致敬。

曼聯贏波後,13戰24分升上第6,較榜首阿仙奴落後6分,下周英超會對紐卡素,然後鬥車路士;至於周中歐聯生死戰,則要作客土耳其嘅加拉塔沙雷。