【英超】被控逾100次違規 哥帥離任賠率急速變大熱 曼城今次真係走唔甩?

英超賽會尋晚公佈核彈級消息,指控曼城喺2009-10球季到2017-18球季間,超過100次違反財政規例,面臨罰分之餘,最嚴重甚至會逐出英超。

英超賽會發聲明指,經過4年嘅調查,正式指控曼城喺2009至2018年合共9個球季內,至少100次違反英超財政規例,當中包括冇向賽會如實地提供收入、球員同埋領隊嘅人工;冇遵守財務規管、冇提供可持續性發展等財務訊息等等,並已將相關文件、控罪提交畀獨立委員會跟進。一旦罪成,曼城將會面對扣分、罰款、甚至係被罰降班。

消息一出、球壇嘩然,各界名宿球評家議論紛紛,當中英國《太陽報》今晨更指,英超各間球會,將聯合要求英超賽會嚴懲曼城,如果證實違規,一定要判罰佢哋降班,仲要喺今季即時執行。

事實上,歐洲足協曾經喺2020年控告曼城違反財政公平原則(FFP),禁踢兩年歐洲賽,但之後曼城向國際體育仲裁法庭(CAS)成功上訴,打甩控罪,而當時份報告就證實有9間英超球會聯署,要求處分曼城,Big 6其餘5隊即阿仙奴、車路士、熱刺、利物浦、曼聯全部有份,另外仲有紐卡素、李斯特城、般尼同狼隊。

《每日鏡報》指,曼城今次比起3年前難搞得多,因為曼城當時上訴成功嘅關鍵,係控罪已經「過期」,但係英超賽會並冇就證據設立追溯期,亦即係話,曼城冇得估計有咩新證據,只能見招拆招。

核彈爆發後,各地博彩公司亦即時「做嘢」,足智彩尋晚已暫停英超冠軍受注,而Betfair更認為哥迪奧拿係下位離任嘅英超領隊大熱,賠率大幅下調至6.5倍。

哥迪奧拿離任亦有蹟可尋,佢曾經話過,如果曼城管理層講大話,佢會即時辭職:「當時球會被指控,我要求高層同我講真話,佢哋解釋完,我選擇100%相信。我話如果佢哋講大話,第二日我就會離開,而且我哋亦唔再係朋友。」現時哥迪奧拿份合約去到2025年;至於曼城下場比賽,係2月12號深夜主場對阿士東維拉。