阿仙奴跨季主場10連勝紀錄終結，周三凌晨英超，雖然佔盡優勢，仍然被紐卡素迫和0:0。全場狂攻冇波入，加上有球疑似12碼，激到領隊阿迪達彈起。
全場近70%控球率，13次射門4次中目標，阿仙奴球員已交足貨，攻勢流暢多變化，特別巴卡約沙卡表現突出，構成大量威脅。但紐卡素中後場構築血肉長城，雖然險象橫生，始終頂得住，不敗走勢已增至13場。
臨完場前，尼基迪亞近射睇住入硬，畀紐卡素門將尼克普比僅僅用腳擋出；之後紐卡素球員禁區內有手球之嫌，球證認為冇問題，令阿迪達好勞氣，仲同紐卡素領隊賀維嘈交，但完場後雙方都回復冷靜，握手致意。
阿仙奴未能完成快車3連勝，17戰44分，比次席曼城多8分，但多踢1場，曼城周四凌晨對車路士。
紐卡素今季仍然只輸過1場，但和波多，目前以18戰35分排第3位。防守力超強，係該隊目前一大優勢，只有11個失球，位列英超之首，跟住到失14球嘅阿仙奴。
以目前走勢，紐卡素堅有機會參戰歐聯，據西班牙《馬卡報》報導，C朗同沙特阿拉伯球會艾納斯合約內，有特別條款列明，若然紐卡素下季有份踢歐聯，可以放C朗為紐記上陣。
賀維賽前被問到此消息時表示：「我祝福C朗，未來繼續取得成功，但佢同紐卡素冇任何關係。」
艾納斯周三為C朗舉行盛大歡迎儀式，佢表示唔會理外間睇法，仲話一直有來自歐洲、美國等唔同球會邀約，但最終選擇最有誠意嘅艾納斯。
