【英超】藍斯度幾乎孭鑊!連續4輪入波 阿仙奴升榜首;夏維斯再做英雄:最緊要團結

曼城、利物浦周日決戰前,阿仙奴驚險攞3分、先過一哥癮!周日凌晨英超,阿仙奴主場2:1險勝賓福特,全靠夏維斯連續第4輪入波絕殺,亦為龍門藍斯度解困,唔駛孭大鑊。

同早幾場大勝相比,阿仙奴今仗贏得好辛苦,但憑球員夠齊心,終於搶得重要3分,喺聯賽榜以28戰64分升榜首,超越今晚對賽嘅利物浦、曼城1及2分。

對於藍斯度派膠幾乎出事,夏維斯同領隊阿迪達賽後都話唔會怪藍斯度,因為錯誤係足球比賽嘅一部份,最重要係繼續團結一致、爭取勝利。

開波後19分鐘,阿仙奴大將迪勤懷斯接應賓韋特傳中,門前頭槌破網,先開紀錄。以為會輕鬆大炒一場,點知去到上半場補時階段,今仗代替拉也正選把關嘅藍斯度犯大錯,接應隊友回傳解圍嗰陣,竟然省中對方前鋒尤尼韋沙彈入網,賓福特追平1:1。

難得正選即孭大鑊,隨時令今仗成為失冠關鍵,好在藍斯度心理質素強大,冇受失誤影響,55分鐘救出艾雲東尼離門40碼笠射;71分鐘再撲出哥連斯頭槌。

阿仙奴攻勢喺尾段越嚟越入肉,終於喺完場前5分鐘,夏維斯接應傳中,門前頭槌破網,連續4輪英超有士哥,助球隊成功反勝2:1。

阿迪達賽後冇怪責藍斯度,反而讚班波夠晒團結:「我唔否認,呢個失誤令場波踢得好辛苦,但係下半場開始,我哋面對逆境嗰陣份外堅持努力,尤其藍斯度救咗唔少險球,亦係我哋全取3分嘅關鍵。錯誤係足球嘅一部份,我為藍斯度同全隊嘅表現感到高興。」

夏維斯亦力撐隊友:「我哋下半場表現好出色,絕對值得全取3分。其實我哋喺補時失波之後,大家都有互相鼓勵。錯誤成日都有啦,我自己都係喺錯誤中學習,先至可以入到波,冇嘢重要得過團隊精神。」