周四凌晨英超補賽，曼聯喺主場對啱啱換教頭嘅列斯聯，以為奧脫福威力應該好易食，點知列斯大打爭氣波，最終曼聯喺落後兩球劣勢下扳平，沉寂多時嘅辛祖成為救主英雄，嚟緊周末再鬥列斯，結局又會係點呢？
曼聯今場有中場大將卡斯米路停賽，冇咗技安，拜仁借將沙比薩正選，級數始終爭啲，開賽一分鐘，即被列斯前鋒干洛圖禁區邊勁射入網，之後加拿祖同沙比薩都有機會扳平，可惜先後失機及被梅斯利亞撲出。48分鐘，華拉尼解圍變烏龍，曼聯主場落後兩球。
坦哈格見勢色唔對，喺59分鐘用辛祖及柏利斯迪，入替韋格賀斯同加拿祖，3分鐘後即見效，拉舒福特頂入1:2，之後輪到辛祖發威，佢喺70分鐘同勞基梳爾合作，之後禁區內建功，自去年9月歐霸盃後再有士哥，最終打和2:2完場。
曼聯目前22戰43分排第3，落後阿仙奴7分、多踢2場；至於深陷護級漩渦嘅列斯聯，21戰19分排第16，多第18位嘅愛華頓1分。
雖然奧脫福12連勝斷纜，不過總算打番起辛祖嘅信心，坦哈格話：「我哋依家有能力喺對手半場控制比賽，辛祖好啱呢種模式，佢可以喺好緊逼嘅空間內突圍……佢係一位好出色嘅球員，佢好努力，我好享受佢嘅演出。」
曼聯下場聯賽係星期日晚再鬥列斯聯，今次係作客出擊，之後下周五凌晨就會轉戰歐霸盃附加賽，首回合造訪魯營鬥巴塞隆拿。
其實喺今場比賽前，曼聯有個利好消息，英國《每日郵報》指卡塔爾體育投資基金，將會喺2月中截標前，正式出價60億鎊收購，並且非常有信心擊敗英國首富拉特克利夫，成為曼聯新主人，如果成事，曼聯就會成為史上最貴嘅球會。
由於卡塔爾體育投資基金已經有PSG，亦即係話，佢哋有機會喺歐洲賽遇到曼聯，到時就會違反歐洲足協條例，所以卡塔爾正打算成立新公司去收購紅魔，錢解決到嘅問題，就不成問題了。
