【英超】艾美利雙殺舊主!維拉作客2:0贏阿仙奴;夏維斯失機 屈堅斯手刃愛隊 助曼城榜首彈出

曼城做生日!周日英超,繼利物浦後,阿仙奴亦喺主場輸波,0:2不敵阿士東維拉,藍月亮於榜首脫穎而出,於聯賽仲剩6輪情況下,有2分優勢,奪冠機會相當樂觀。

由於周日較早時候,利物浦主場0:1負水晶宮,目前最新形勢,榜首3雄各賽32場,曼城73分,阿仙奴及利物浦71分。曼城之後會作客白禮頓、作客森林、主場對狼隊、作客富咸、作客熱刺、主場對韋斯咸,當中對手只有熱刺較强,全勝6場封王,絕對唔出奇。

阿仙奴季尾對手相對較強,之後仲要對車路士、熱刺同曼聯,但今晚對維拉已全失3分,爭標難度非常巨大。佢哋今仗全力出擊,中場馬田奧迪加特上半場多次送出靚波,但夏維斯錯失至少兩個機會,薩卡亦兩次近門射偏。

維拉上半場稍陷劣勢,但下半場已開始反客為主,除咗防守穩固番,埋門亦具威脅,若非門楣門柱兩度救阿仙奴,維拉早已領先。

阿仙奴下半場中後段開始莫氣,入球機會大減,維拉再喺84及87分鐘,乘對手防線露出空位,由里安拜尼、奧尼屈堅斯入波,以2:0力挫強敵,取得重要作客3分。

當中屈堅斯今季已轟入19個聯賽入球,喺射手榜排第二位,僅落後夏蘭特1球。屈堅斯賽後話:「今場波我哋表現完美,絕對值得全取3分!坦白講,我由細到大都係阿仙奴Fans,但落到場比賽就冇情講,尤其我哋都要為歐聯資格而戰。」

維拉贏波後,33戰63分穩守第4位,比少踢1場嘅熱刺多3分,下季參戰歐聯機會又再提升。