'

【英超】艾寧夏蘭特嚟料!一個特點摧毀韋斯咸 老竇情繫曼城超興奮

社區盾唔掂?英超先嚟料!艾寧夏蘭特首度亮相英超,發揮絕頂爆發力,憑呢個特點包辦兩個入球,曼城作客2:0輕取韋斯咸。

上周社區盾對利物浦,艾寧夏蘭特表現備受批評,究竟有鋒好定無鋒好?有得揀點都好過冇得揀,艾寧夏蘭特萬一唔得,都仲有「新阿古路」祖利安艾華利斯。嚟到開鑼戰,當然繼續用夏蘭特,配基亞利殊、菲爾科頓。

韋斯咸初段一輪急攻後主力防守,全面收窄防線,曼城佔84%控球率,但得個搓字,欠缺突破板斧。超級前鋒夏蘭特主要企喺中路等待突破,同曼城一貫進攻模式,仲係未完全磨合,控球機會亦少。

去到36分鐘,就係憑呢位挪威猛將嘅爆發起動力,接應直線爆入禁區,令韋斯咸後備門將艾路拿將佢撲跌,夏蘭特親自主射入網,打破悶局。

韋斯咸狀態未完全操起,反撲唔算太大威脅之餘,防線露出更多空位,65分鐘,傳球大師奇雲迪布尼一個手術刀式靚直線,夏蘭特再次起動爆發,韋斯咸後衛望住佢單刀射成2:0。見錘仔幫冇力反擊,曼城留番啖氣,換出多個後備,搓到完場。

夏蘭特爸爸艾菲爾夏蘭特,2000-03年曾効力曼城,血性超強,講明唔妥曼聯,之後畀堅尼一個凶狠攔截導致重創,提早收山。今仗佢有入場觀戰,見到囝囝射成2:0後,極度興奮,振臂歡呼。對呢位老竇嚟講,囝囝能夠喺英超登場兼有好表現,當然開心到爆啦!