補時6分鐘，一億鎊先生迪勤懷斯取得加盟阿仙奴後首個入球，帶領球隊主場贏3:1，戲劇性反勝曼聯。
阿仙奴開季幾經辛苦僅勝森林同水晶宮，上仗同富咸更打和2:2，表現未如人意。唔少人詬病由車路士轉會嘅夏維斯，根本孭唔起中場核心角色，令球隊攻守均受影響。
領隊阿迪達無視外界批評，大戰當前，依然起用夏維斯做正選，德國國腳卻依然欠缺起色，開賽初段曾離門幾碼起腳，點知撻Q，錯失黃金機會。
曼聯陣容與上仗反勝森林大致相同，由阿特蘭大轉會、身價7500萬歐元的中鋒海倫，亦首度列入後備名單內。由於作客，曼聯今仗中後場縮得較後，搵機會突擊，開波27分鐘，就畀佢哋打破缺口。
又係夏維斯，門前失機都算，一次中場甩波，被艾歷臣截到，立即直線靚傳拉舒福特，福仔招牌殺手鐧，由左路推中，再射遠柱入網。
不過，曼聯35秒後即被扳平，布卡約沙卡、加比爾馬天尼利左路短傳配合，拉散紅魔防線，再傳交中路，隊長馬田奧迪加特殺入禁區怒射破網，阿仙奴閃電追和1:1。
下半場戰況膠著，危險鏡頭唔多，67分鐘曼聯作出兩個調動，海倫首度登場，利辛度馬天尼斯受傷，由麥佳亞入替。阿仙奴方面，阿迪達於76分鐘終換走夏維斯，由法比奧韋拉入替。
補時共8分鐘，兩隊之前都踢得保守，看似和波收場，唔少球迷巳提早離場，但全場高潮先至出現。90分鐘，曼聯後備加拿祖曾藉突擊單刀建功，但VAR介入後，判定加拿祖越位在先，曼聯慘食詐胡。
96分鐘，阿仙奴開出角球，迪勤懷斯遠柱無人看管，勁射省中伊雲斯，改變方向近柱入網，主隊反先2:1。藉曼聯全軍谷上，阿仙奴再由加比爾捷西斯單刀靚Cup建功，以3:1勝出呢場戲劇性比賽。
阿仙奴加入熱刺、韋斯咸、利物浦行列，4戰10分，落後曼城兩分，國際賽期後會作客愛華頓，夏維斯開季4仗0入球0助攻，到時仲會唔會係正選？
曼聯繼不敵熱刺後，又輸畀另一倫敦球會，開季作客兩連敗，係49年來首次。紅魔目前2勝2負，下仗主場對黑馬白禮頓。
