'

【英超】肥梳弗爆、福仔又入波、炒般茅!曼聯聯賽4連勝 前4好穩陣?

冇咗C朗嘅曼聯,繼續WWW,周三凌晨主場3:0大勝般尼茅夫,再次取得英超4連勝,追近同市宿敵曼城,只有1分差距。

C朗已正式亮相沙特阿拉伯球會艾納斯,風風雨雨過後,曼聯更可集中精神,世界盃後聯賽重開,之前已連贏諾定咸森林及狼隊,今仗又搞掂般尼茅夫,藉對手較弱,聖誕新年快車,只有紅魔完成3連勝。

曼聯前4位置暫時幾穩陣,比之後嘅熱刺、利物浦,領先5及7分;同紐卡素同得35分,比榜首阿仙奴、曼城少9及1分。

曼聯今仗出番麥佳亞做中堅,拍住連迪路夫,弗到爆嘅勞基梳爾可以打番左後衞,仲貢獻入球及多次助攻,係全場最佳球員。

23分鐘曼聯已開紀錄,由中場孖寶合作完成,艾歷臣開出罰球,搵到拍檔卡斯米路,呢位巴西國腳近門球不著地撞射入網。

般尼茅夫都有入波機會,但腳風唔順,換邊後4分鐘又失多球,勞基梳爾後場策動攻勢,帶波舞上前線,最後接應加拿祖右路傳中,第一時間掃射入網。

第3球86分鐘出現,又關肥梳事,佢左路長傳至右路禁區邊,落點恰到好處,般奴費南迪斯第一時間回送中路,拉舒福特近門輕易射成3:0,完成英超4連勝。

勞基梳爾喺2021年歐國盃弗爆,更被稱讚為英格蘭卡路士,可惜呢年零狀態返唔到高峰,如今見佢近呢幾場嘅勇銳,相信唔少曼迷都飲得杯落了。