【英超】肥普同車仔和平分手 下月孖林伯回歸史丹福;彭馬入選歐國盃大軍 出po答謝恩師

普捷天奴極速回歸史丹福橋?講緊友誼賽啫,肥普會喺6月9號率領世界明星隊,出戰英格蘭元老隊,巧合嘅係,英格蘭元老隊會由另一前車路士領隊林柏特領軍,兩大舊帥齊齊回歸,肯定成為焦點。

至於車路士下任主帥誰屬,目前仍然係眾說紛紜,啱啱離開白禮頓嘅迪些比目前係大熱,另外前德國國家隊教練費力克、曾傳出會執掌利物浦嘅士砵亭教練阿摩廉都有機會上「車」。

普捷天奴突然落「車」,今季光芒四射嘅高爾彭馬,喺IG向肥普道謝:「領隊,多謝你為我所做嘅一切一切,令到我夢想成真。」22歲嘅彭馬季前由曼城轉投車仔,今季英超上陣33場入22球,當選英超最佳年青球員,仲入選埋英格蘭歐洲國家盃初選大軍。

52歲嘅普捷天奴,喺舊年夏天入主車路士,簽約兩年,上任後使咗4億鎊收購球員,但球隊今季表現都係未如理想,即使殺入英聯盃決賽,但最終被利物浦擊敗而屈居亞軍,足總盃亦4強止步。

不過去到季尾,車路士終於上力,喺聯賽6連勝後最終排名第6,雖然失落歐聯席位,但都有番個歐霸或歐協聯入場券做安慰獎。

普捷天奴同車路士喺雙方協議下和平分手,呢位阿根廷名帥喺聲明中表示:「多謝車路士管理層同體育總監,畀呢個機會我執教球隊,今季排名唔算太差,但我知車路士一定會繼續力爭上游,祝球會下季會更好。」