今晨英格蘭聯賽盃開打，第二圈賽事有唔少英超球隊登場，當中包括今季脫胎換骨嘅熱刺，可惜佢哋倒灶射輸12碼畀富咸，今季可以爭嘅盃話咁快又少一個。
由第二輪開始，英超球隊開始加入聯賽盃戰團，有歐戰任務嘅球隊，去到第三輪先加入，所以本周聯賽盃比賽，得熱刺同車路士兩支傳統豪門有份踢，歐洲冠軍曼城、韋斯咸等8隊，就高掛免戰牌。
熱刺喺新帥普斯迪高古帶領下，今季表現令人眼前一亮，大踢進攻悅目足球，目前聯賽3戰2勝1和，包括擊敗曼聯，令唔少球迷對佢哋有所憧憬，甚至估計有機會拎番隻盃仔破錦標荒。
不過，喺令人失望方面，熱刺永遠唔會令人失望。今場作客富咸，熱刺以李察利臣掛帥，孫仔、麥迪臣、比蘇馬等主力先列後備，19分鐘，中堅雲達維恩就擺老烏，富咸領先1:0。
換邊後戰至56分鐘，熱刺前鋒李察利臣頂入扳平1:1，呢位巴西國腳終於開齋，不過形勢仍然處於下風，富咸卜比列特、哈利威爾遜起腳均無功而還，熱刺最終捱到打和互射12碼，可惜中堅達雲臣山齊士宴客，富咸則5射全中，熱刺提早畢業。
賽後普斯迪高古對於李察利臣表現，仍然有少少微言：「佢入到波係好，但我覺得今場唔係佢表現最好嘅比賽。我哋傳波失誤次數好多，除咗佢，仲有其他幾位球員，呢個係我希望李察利臣特別要改善嘅地方。」
熱刺對上一次獲得正式賽事錦標，正正就係聯賽盃，不過已經係2008年嘅事，之後一直同冠軍無緣，目前熱刺剩番足總盃同英超戰線，衝冠難度相對較高。
至於今輪英超球隊，除咗富咸晉級之外，另外盧頓、賓福特、水晶宮、狼隊全部過關。今晚輪到車路士登場，對AFC溫布頓。
