哈利卡尼繼續著火，周日英超又包辦兩球，帶領熱刺作客2:0挫森林，3勝1和保持不敗，同曼城都有10分，追趕榜首阿仙奴。
上仗小勝狼隊，哈利卡尼射入全場唯一入球，相隔一周，脚風更順，5及81分鐘，接應古路施夫斯基、李察利臣助攻，射成2:0，如果唔係12碼畀甸恩軒達臣救出，隨時有機會大演帽子戲法。卡尼目前4仗入4球，落後射手榜榜首艾寧夏蘭特2球。
卡尼著火之時，拍檔孫興民仲未撻著，依然踢得好沉，古路施夫斯基、比列錫都比佢有威脅。李察利臣下半場入替老孫，亦有出色表現，同卡尼非常有默契。卡尼入第二球，李察利臣嘅傳送更加係一絕，如果老孫狀態仲未起，干地有機會改用呢位巴西鋒將打正選。
英超完成第4輪賽事，阿仙奴係唯一全勝之師，之後有曼城、熱刺、白禮頓，都係3勝1和。韋斯咸作客1:0挫維拉，打開勝利之門，只有3隊仲未開齋，愛華頓、李斯特城、狼隊。
今季首次周中快車，話咁快就上演，重頭戲首選利物浦對紐卡素，紅軍剛以9:0狂數般尼茅夫，平英超紀錄，紐卡素以升格班霸為目標，之前激和曼城有口皆碑，睇吓可唔可以又令另一名牌失分。
阿仙奴主場對維拉，將會挑戰5連勝，始終謝拉特隊波開季麻麻，兵工廠贏面都幾大；至於林柏特嘅愛華頓，攻力極弱，作客列斯聯唔易踢，開齋仍有難度。
周中快車秩序
周三2:30am 水晶宮 VS 賓福特
周三2:30am 富咸 VS 白禮頓
周三2:45am 修咸頓 VS 車路士
周三3:00am 列斯聯 VS 愛華頓
周四2:30am 般尼茅夫 VS 狼隊
周四2:30am 曼城 VS 森林
周四2:30am 阿仙奴 VS 維拉
周四2:45am 韋斯咸 VS 熱刺
周四3:00am. 利物浦 VS 紐卡素
周五3:00am 李斯特城 VS 曼聯
