得中場得天下，英超群雄砌靚中場線！
搞足成個月，阿仙奴終於齊人開飯，轉會大神Romano報導，呢單交易終於Here We Go，轉會費係100M＋5M，打破阿仙奴球會紀錄就梗，仲刷新埋英格蘭球員紀錄，迪勤懷斯呢鋪真係威到盡。
阿仙奴領隊阿迪達，早前受訪時透露，夏維斯來投後，好有機會踢番以往嘅攻中位置，唔使再好似喺車仔嗰陣咁裝「假9」，表現已令人期待，依家買埋迪勤懷斯，配合馬田奧迪加特、柏迪、佐真奴，阿仙奴中場線絕對係星光熠熠。
另邊廂，利物浦亦已成功買入蘇保斯禮及麥卡里士打，配合喺英格蘭國家隊轉型大成功嘅阿諾、神軒，呢條全新中場線亦甚具睇頭。
眼見雙「紅」來勢洶洶，但曼城放走了根度簡後，只簽了高華錫頂上，戰鬥力未必及得上上季，有傳哥迪奧拿已密切注視法蘭基迪莊，研究簽下佢嘅可能性。
至於賣盤在即嘅曼聯，雖然散貨唔順利，但仍然肯使錢買人，繼簽入車路士中場美臣蒙特後，準備繼續買中場，今次目標，係喺世界盃表現出色嘅26歲摩洛哥國腳安拉拔。
意大利媒體包括《Violanews》等更爆料，指曼聯已經同呢位費倫天拿防中達成個人協議，只要同費倫傾埋轉會費細節，呢單交易就可以成事。
安拉拔喺荷甲出道，亦踢過比甲，之後喺維羅納打響名堂，近季成為費倫天拿核心，舊年世界盃打入4強，更加係佢嘅人生巔峰，
獲歐洲各大球會垂青，只係由於當時係季中，冬窗走唔成，今夏離隊似係勢在必行。
