三球王又嚟料！周六英超10點場，正當大家焦點去晒利物浦度，白禮頓再一次大捷，日本球王三笘薰又入波又助攻，當中仲有一球係麥巴比＋美斯式疾走金球，技驚四座！
白禮頓季前被拆骨，麥卡里士打同卡些度先後被撬走，但佢哋成個體系成熟到暈，啲波依舊好睇又好食，上仗開鑼戰，白禮頓就大炒盧頓4:1。
嚟到今仗，白禮頓再一次大勝，今次受害者係狼隊。白禮頓今仗作客狼隊，繼續用4231陣式，冇咗雙核，依然有小將安斯素、基摩同哥斯撐場，馬治、三球王同韋碧克攻堅。
戰至15分鐘，今季暫時最靚金球出現，三笘薰喺左路疾走，過五關斬六將殺入禁區，再冷靜燙遠柱入網，完全係美斯腳法+麥總速度，為大捷揭開序幕。
換邊後，白禮頓繼續主宰大局，韋碧克勁射被撲出不遠，三笘薰即時回傳入中路，艾斯杜邊恩射成2比0。
三球王斬獲助攻後，已於英超交出7次助攻，成為日本史上第一人。之後輪到白禮頓另一光芒四射嘅球星馬治發威，連取兩球，狼隊靠後備入替嘅南韓球星黃喜燦破蛋，4比1完場。
白禮頓連續兩場贏4比1，全取6分之餘更勁入8球，暫時力壓群雄升上榜首，真係唔講得笑。反之狼隊兩戰全敗，今季都怕且要為護級而戰。
