利物浦又失分，周六英超主場3:3和白禮頓，已經落後榜首阿仙奴11分之多。莫講話爭冠軍，以目前利物浦水準，直情連前四都好難入，莫非高普真係有「七年之癢」？
雪上加霜嘅係，利物浦未來兩周將面對地獄賽程，周中歐聯對格拉斯哥流浪，周末英超作客阿仙奴，跟住再對格流，最後主場對曼城。
以目前紅軍狀況，兩場英超輸晒堅唔出奇，甚至今時今日嘅利物浦，對格流亦冇必勝把握。高普面臨重大危機，呢個地獄賽程，會唔會係壓垮佢嘅最後一根稻草？
有球迷對高普已失去耐性，提出要換領隊。雖然高普幾乎為紅軍攞齊重要錦標，但今季水準的確大跌watt，踢7場只得10分，刷新咗佢個人領軍以來最差開季成績。
「七年之癢」，係高普一個魔咒，呢位德國名帥之前教緬恩斯、多蒙特，都係大約7年就黯然離開，依家剛好係佢第7年執教紅軍，唔通魔咒真係有機會再現？
要起死回生難度唔細，依家利物浦唔係球員能力問題，係心態問題，好多球員都冇釐神氣，欠缺爭勝決心。文尼重要性大到你唔信，但已無法挽回。高普賽後亦話，講晒畀球員知要點做，但就係執行唔到，言語間充滿無奈。救心，永遠最困難。
作為主帥，高普當然亦有責任，即如阿歷山大阿諾特，明知係防守黑洞，連修夫基都唔吼佢，高普依然繼續重用，今仗對白禮頓，開波17分鐘已失兩球，阿諾都有責任，加上全場不停犯錯，共有25次失控球權，屬全場之冠，令利迷睇到火到嚟，賽後網上狂抦，指呢位23歲右閘表現嘔心，程度直達災難級，叫高普唔好再用佢做正選。
群情洶湧，高普真係要認真考慮，事實上，阿諾再咁落去，隨時成為第二個麥佳亞，好似做乜都錯，點都會畀人鬧，形成惡性循環，越畀人鬧越冇信心，越冇信心越易出事，然後又繼續被插……卡列奧斯亦係咁玩完，畢竟冇幾多個好似阿仙奴沙加咁，可以走出呢個循環，暫時做後備，其實都係保護阿諾嘅足球生命。
利物浦未來5場賽程
5/10 主vs格流
9/10 客vs阿仙奴
13/10 客vs格流
16/10 主vs曼城
20/10 主vs韋斯咸
