英格蘭U19喺上星期稱霸U19歐洲國家盃，由分組賽到決賽，5戰全勝入12球、失2球，表現大超班，令唔少英格蘭球迷對佢哋充滿期望。
呢隊小三獅嘅21人大軍名單中，估都估唔到，阿士東維拉竟然係大戶之一，同利物浦、車路士一樣，一共有3人入選，而且3人都係中場，喺決賽都有份上陣之餘，仲夾埋入咗2球，2球都係加時入，帶領小英軍喺決賽以3:1擊敗以色列。
呢3位小將分別係卓胡麥加（Carney Chukwuemeka）、伊路賓南（Tim Iroegbunam）同艾朗藍斯（Aaron Ramsey、唔係以前阿仙奴嗰個）。雖然佢哋冇乜英超經驗，但經過今次大賽洗禮，唔少人都認為佢哋前途無限，不過除咗U19三劍俠，積及藍斯（艾朗藍斯大佬）、卡連凱頓（Kaine Hayden）等新星亦已經嚟料，尤其積及藍斯上季更成為主力，一時間咁多潛質小將湧現，謝拉特點樣用佢哋，成為唔少維拉迷嘅關注焦點。
英國傳媒《BirminghamLive》，日前就同「神奇隊長」做咗個專訪，當中當然有講到U19三劍俠同維拉青訓嘅前景。
「我想講，年齡只係一個數字，如果有足夠能力，就可以踢正選。」
問：你會畀咩建議呢班維拉青訓系統出身嘅年輕人？
「我承認我係偏心，因為我都係通過本土青訓而成為球員，我知道實現夢想嘅感覺係好正，而且令球員嘅家人自豪。我想向呢班土生土長嘅小將傳達一個訊息：只要你表現出應有嘅能力，就一定有得落場！」
