'

【英超】綠木違反保釋條件 即時還柙 正式被控強姦等三項罪名;老友科頓生性 續約加人工

年少輕狂,容易犯錯,只要肯改仍值得包容,但唔係每個人都會珍惜機會。曼聯新人王格連活特未有反省自身行為,一錯再錯,足球事業勢必玩完。

格連活特今年初涉嫌強姦及毆打女友,震動球圈。一月獲准保釋後,雖然曼聯未有再給予上陣機會,但講咗過完冷河、肯定佢肯改過自新後,唔排除會再起用。近期亦有唔少曼聯球迷,開聲撐綠木,希望佢可以上陣。只有21歲、自家青訓產品,又真係幾好波,唔用的確幾嘥。

正當前路見曙光,卻傳來壞消息。格連活特因違反保釋條件,涉嫌私下接觸原告,亦即前女友Harriet Robson,被英國警方再次拘捕,正式落案控以三項罪名,包括強姦、強行控制他人、襲擊。

Harriet Robson

今次仲要係即時還押,下周一法庭候審。經過今次違反保䆁條件,信譽再破產,相信格連活特足球前途已盡毀,難以翻身。

一念天堂、一念地獄。格連活特同輩有菲爾科頓,英格蘭青年軍一直晉升大國腳,二人感情要好。兩人2020年為國家隊踢地標戰作客對冰島後,曾因帶女返酒店引起軒然大波,即時被踢返國。

後生仔貪玩,最緊要有掣㩒,適可而止。菲爾科頓之後收歛咗啲,係試過同基亞利殊出去蒲畀哥迪奧拿發現,鬧到趴街,同埋疑似有婚外情,但佢就用球場上表現去令批評者收聲。曼城喺周日大戰利物浦前,更官宣同菲爾科頓續約至2027年,人工三級跳,周薪由4萬鎊大幅增至22.5萬鎊。

經過冰島事件教訓,一個如日中天,另一個唔改不特止,仲搞出更大鑊嘅刑事案件,一舖清袋,真係浪費晒自己嘅足球天賦。