坦哈格帶領曼聯，好消息頻傳，令擁躉信心大增，除咗有機會再捧盃，打破6年冠軍錦標荒，連格連活特都回復「清白身」，有機會於下半季復出，增加進攻籌碼。
曼聯喺英格蘭聯賽盃準決賽次回合，主場2比0再次擊敗諾定咸森林，兩回合贏夠5比0，打入2月26日嘅決賽，同紐卡素爭奪冠軍。如果贏波，將會係紅魔6年來首項錦標。
擊敗森林，令曼聯主場連勝紀錄增至12場，查頓辛祖休息多時下終於復出，後備登場轉踢10號位，表現唔錯。冬季轉會窗借入嘅荷蘭國腳中鋒韋格荷斯，唔止已經有波入，更獲得一致好評。雖然中場主力艾歷臣養傷至5月，但曼聯團隊又真係抵讚，火速從拜仁借入沙比薩頂替，填補空缺。
曼聯好消息接踵而來，就連天才前鋒格連活特亦宣告甩難！英國皇家警察檢察院，已撤銷佢涉嫌強姦、傷人等3項控罪，現只待曼聯自己內部審視後，呢位21歲前英格蘭國腳就有望重返球場。
綠木上次比賽，係去年1月22號對韋斯咸，之後畀前女友Harriet Robson上載影片，顯示自己傷勢同錄音等證據，一星期後綠木被警方拘捕，曼聯即時作出停賽、禁賽令。
17歲就為紅魔上陣，綠木被視為歐洲最有潛力嘅前鋒之一，但私生活一直混亂，被警方拘捕後，贊助商紛紛解約，連隊友都unfollow埋佢。如今甩難之後，綠木亦表示如釋重負，要多謝家人、朋友一直支持。
曼聯發聲明，話會展開審核程序，再決定一下步點做。佢哋近日向英超提交下半季大軍名單，綠木仍然喺B名單之中（21歲或以下球員），理論上係可以隨時上陣，等坦克增添籌碼，不過一般估計，除咗狀態不足之外，曼聯用番格連活特嘅最大阻力，其實係來自贊助商。
