【英超】經典3:2!落後兩球 曼聯奇蹟反勝維拉;海倫開齋波奠勝:陸續有來!

曼聯球迷拆禮物日收大禮!新股東拉傑夫爵士入主,已經令唔少曼迷充滿期待,估唔到尋晚對維拉,更上演絕地反擊戰,由落後兩球到反勝3:2,奠勝者更加係終於喺聯賽開齋嘅海倫!

上陣逾1000分鐘,海倫終於喺英超入波,仲要係奠勝球,呢位丹麥國腳當然High到爆:「 等咗好耐喇!依家我係最開心嘅人!正如領隊話齋,我之前喺歐聯入過吓波,依家終於輪到英超,希望陸續有來啦!」

至於從來未試過喺賽後記招落敗嘅坦哈格,亦風騷咁話:「半場嗰陣我叫佢哋堅持,揸緊信念,所以大家見到,佢哋下半場出嚟嘅氣氛改變咗好多。就算落後0:2都唔緊要,唔好放棄就得!如果我哋踢出最佳水準,就可以擊敗任何對手!」

曼聯今場用番拉舒福特踢左邊,右邊加拿祖,拍住海倫擔正攻堅,中堅位用華拉尼拍莊尼伊雲斯,至於維拉繼續由屈堅斯同麥堅恩掛帥,甫開賽亦搶得主動權,21分鐘,麥堅恩右路開罰球,奧拿拿冇出迎下,個波直入遠柱開紀錄。5分鐘後,又係麥堅恩死球,佢開角球去遠柱,丹當卡接應二傳建功,半場維拉領先曼聯2:0。

以為英超曼聯又輸一場,估唔到換邊後,曼聯上演驚天大反擊,加拿祖食完詐糊後,喺59分鐘終於嚟真,佢接應拉舒福特靚傳再建功,掀起逆轉序幕;去到71分鐘,加拿祖再次接應傳中射入,曼聯追成2:2平手。

氣勢如虹嘅曼聯,戰至82分鐘,更加令呢場波成為經典,曼聯快開角球,海倫把握機會射入,終於喺英超開齋,帶領紅魔反勝維拉3:2。曼聯贏波後,終止4場不勝兼食白果嘅頹勢,19戰獲31分升上第6。至於維拉19戰39分排第3。