曼聯終於返勝軌！周六晚英超早場，是非多多嘅曼聯作客以1:0擊敗富咸，隊長般奴費南迪斯一吐烏氣、補時絕殺對手，雖然戰情唔算搶眼，但總算全取3分，暫時走出連敗頹勢。
曼聯今場收起拉舒福特，賽前有消息指佢係受傷，但咁啱佢喺大敗後被爆蒲通宵慶祝生日，唔少人都話其實係被坦哈格雪藏。點都好，今場冇福仔，曼聯用加拿祖、安東尼、般奴支援射手海倫，一對中堅係莊尼伊雲斯拍麥佳亞，富咸則有安達斯彭利拿倒戈。
比賽初段麥佳亞撞親個頭，好在經治療後冇乜事，可繼續披甲，曼聯更加喺8分鐘差啲開紀錄，麥湯文尼近門撞入，不過VAR指麥佳亞越位在先。之後雙方拉鋸，半場踢成0:0。
曼聯換邊後冇乜太大起色，加拿祖勁射被救出後，輪到富咸強攻，哈利威爾遜、柏連拿同韋利安施射，先後被回復信心嘅奧拿拿撲走。以為各得一分之際，去到補時1分鐘，富咸解唔到圍，第200次為曼聯上陣嘅般奴，喺禁區邊地波破網，成功絕殺富咸1:0。11戰過後，曼聯共得18分暫列第6位。
入波功臣般奴，賽後終於有啲一吐烏氣嘅感覺：「呢場勝仗提升到我哋嘅信心，但我哋明白要繼續做好，先可以令曼聯復甦。下場歐聯（對哥本哈根）好重要，係出線生死戰。」
至於紅魔名宿舒米高，就大讚頂硬上嘅麥佳亞有啲「魔性」：「呢場波唔精彩，質素亦唔高，但我哋已經好耐冇見過曼聯球員似一位戰士，喺我眼中，最佳球員係麥佳亞，佢無處不在，如果曼聯今日冇佢，肯定贏唔到。」
