唔通真係守得雲開？尋晚英超，當大家都聚焦喺阿仙奴身上，同時間開賽嘅車仔亦終於贏波，以1比0小勝列斯聯，總算回復多少信心，迎接周中歐聯生死戰。
成個2月入得1球波，各項賽事6戰3和3負，到底樸達點解仲有得留低？唯一解釋係如果車仔炒樸達的話，需要賠5000萬鎊，係史上最貴嘅賠償金，冇計，到底係邊個天才諗到簽5年約？
既然無可挽救，車路士亦唯有繼續砌。而事實上，車仔眾將今場嘅鬥志同決心都幾好，個別球員質素亦相當高，但砌埋一齊就硬係冇form，而且死球戰術、主理人亦唔夠清晰，呢點樸達絕對責無旁貸。
今場同近幾場波一樣，個波都係喺龍門口飛來飛去，包括史達寧傳中，菲歷斯頂歪咗；芝維爾罰球，韋斯利科芬拿又頂唔中目標；上半場仲有球史達寧靚直線，夏維斯單刀又過唔到門將。
今場史達寧相當活躍，威脅力頗大，接近22分鐘，佢接應傳波後撞番去禁區頂，菲歷斯第一時間撞射，有角度有力度，可惜中楣，如是者，車仔場面一直佔優，但苦無破門之法，終於去到下半場53分鐘，芝維爾角球，韋斯利科芬拿勁頂破網，最終車仔亦憑呢球波險勝列斯聯。
不過，一般估計，除非今場車仔輸咗，否則無論贏定和，樸達生死都會喺4日後決定，亦即歐聯16強次回合、主場迎戰多蒙特呢場波。
首回合車路士作客輸0比1，雖然形勢佔優，但同以往幾場一樣，都係唔識入波、把握力奇差。最重要一點，係近期多蒙特氣勢如虹，2023年10戰全勝，對上一次正式賽事輸波，已經係世界盃前嘅事。
各位球迷，你哋想車仔反Cup多蒙特保住樸達，定還是今季已完，希望車仔拿拿臨輸埋佢換帥？
