【英超】紐老師敗家 加歷查批死:有佢冇冠軍!高普投降 對韋斯咸出錘仔尅星

利物浦射手達雲紐尼斯連續4輪英超冇士哥,多次錯失入球機會,成為本季英超第二大「失機王」。紅軍頻頻失分,爭冠處於被動,紐尼斯被球迷評為罪人之一。

事實上,高普的確畀咗好多機會佢,但耐性都有用完嘅一日,有消息指今晚英超作客韋斯咸,高普會將佢貶為後備,由過往對韋斯咸特別醒神嘅加普出任正選,務求贏番場,保持一絲爭標機會。

數據冇呃人,達雲紐尼斯今季英超32次上陣累積11球,比去季全季僅得9球確係有進步,但呢位烏拉圭中鋒嘅把握力,仍然未有大改善,佢今季已錯失26次黃金機會,僅次於30球嘅曼城射手夏蘭特,係今季英超錯失入球機會第二多球員。

近4場聯賽交白卷,10次射門只得2次中龍,難怪利物浦呢段期間只得1勝1和2負,已跌落第3位,落後阿仙奴同曼城。

上場對愛華頓,喺落後1球嗰陣,達雲紐尼斯有黃金機會,近門只係對住比克福特,但偏偏又射正呢位愛華頓門將,非常大嘥。利物浦名宿加歷查表示:「佢對愛華頓半場前所錯失機會,喺佢嘅水平嚟講,絕對唔可以原諒。加盟球隊兩年,射術冇進步,以咁嘅前鋒作為主力射手,好難會攞到重要錦標。」

高普亦決定今晚將呢位24歲烏拉圭中鋒貶為後備,安排剛傷癒嘅加普做正選。加普係韋斯咸尅星,去年尾聯賽盃8強主場大勝5:1入一球;上季英超作客贏2:1亦有士哥,加盟利物浦後3次對韋斯咸入2球兼全勝,今仗擔正面對有主力中堅阿古特、馬夫洛柏路斯受傷嘅韋斯咸,大有機會再入波,為利物浦帶嚟客場勝利。