曼聯開季兩連敗，利物浦都係兩連和咋！全靠路爾斯戴亞斯個人表演，打少個嘅利物浦，主場只能1:1迫和水晶宮。下周一深夜雙紅會，邊隊可以打開今季勝利之門？
開鑼戰驚險迫和富咸，利物浦開季火氣唔夠，今仗更有多人因傷缺陣，包括麥迪比、艾簡達拿、祖達、法明奴等多達10人。
達雲紐尼斯連續兩場後備建奇功，今仗終於正選登場，拍沙拿、路爾斯戴亞斯攻堅。雖然佔主動，但占士米拿、哈維艾利洛、法賓奴組成嘅中場線，傳送欠穿透力，唔少球員依然谷唔起，形成得個攻字，但威脅唔大。
水晶宮戰術勝在實用，你全軍壓上搶攻，啱晒我踢死守突擊。32分鐘第一個射門，就係入波。韋費特沙夏再做突擊王，放甩慌失失中堅尼達利菲臘斯，VVD包唔切，沙夏射成1:0。達雲紐尼斯補時射中柱，利物浦半場又要追落後。
下半場利物浦依然冇板斧，又冇咗後備神兵奧歷治，越踢越急，達雲紐尼斯57分鐘發老脾，蓄意用頭頂對手，被罰出場。
打少個死梗？唔係喎！整體唔得，打個人囉！路爾斯戴亞斯喺61分鐘打橫推過5至6個對手，禁區邊射靚波入網。追成平手，利物浦血性出番嚟，完全唔似打少個，但水晶宮防守真係出色，頂得住有餘，雙方最終和1:1。
