簡迪缺陣、龍門送大禮、前鋒打少三個，車路士由龍變蟲，作客慘負列斯聯0:3。列斯聯上次贏車仔，已經係20年前，今仗重現當年青春無敵氣場，快打旋風，贏得乾淨俐落。
車仔上仗踢得好好，但球證同VAR球證都發雞盲，慘被熱刺逼和2:2。今場車仔一開波就處於被動，畀列斯聯連番進襲。最慘係中場靈魂簡迪養傷，干拿加歷查首任正選，呢位上季喺水晶宮大放異彩嘅新星，可能仲未融入體系，令車仔經常爭輸中場。
主隊33分鐘先開紀錄，要多謝車仔龍門送大禮，艾度亞文迪門前接應回傳，玩腳法想扭過艾朗臣，但被呢位美國國腳搶甩腳下球，一聲唔該送入空門。艾度亞文迪唔係第一次用腳出事，上季歐聯主場對皇馬，佢畀賓施馬入嗰球，都係咁樣出事。
4分鐘後，車仔雪上加霜，畀列斯聯前鋒洛迪高摩連奴接應自由球頭槌破網，贏至2:0完半場。
杜曹64分鐘孤注一擲，換走佐真奴、干拿加歷查，調入普列錫、薛耶治兩位攻擊好手，全面搶攻。但防守削弱下，4分鐘後畀積夏里遜入多球，輸夠0:3完場之餘，高列巴尼仲兩黃一紅被逐，呢劑堅惡搞。
對住列斯聯，冇簡迪即輸晒中場，直接暴露三中堅弱點，仲有樣大鑊，夏維斯、史達寧、美臣蒙特組成嘅攻擊線，完全冇貨交，開鑼至今都冇波入，進攻力非常疲弱。夏季轉會窗就快關閉，睇埋今仗，相信車仔都會加速收購奧巴美揚。
列斯聯相隔20年，終於再次擊敗車路士，當時正係阿倫史密夫、基維爾、維度卡、活基治嘅輝煌時代，呢班青年近衛軍，仍然係好多球迷嘅青春回憶。列斯今季個頭開得靚，之前分別贏狼隊、和修咸頓，保持目前表現，應該唔駛好似上季咁辛苦護級啩。
