紐卡素又輸，周六早場作客0:2負曼城，聯賽連盃賽3連敗，有機會畀利物浦過頭，連第5位都保唔住。
連續3場鬥班霸，對手都打出水準，輸波亦無話可説，紐卡素只要保持信心，更急切係改善一直疲弱嘅入球把握力，仍然有力爭取來屆歐戰資格。目前紐記已被利物浦逐步追貼，若然紅軍周一凌晨贏曼聯，將取代紐卡素嘅第5位置。
今次曼城對紐卡素，哥迪奧拿出返齊最強武器，艾寧夏蘭特單箭頭，基亞利殊、奇雲迪布尼、科頓後上支援，雙防中係根度簡、洛迪卡斯簡迪，架生齊晒。
紐卡素近期唔順Q，先係英超不敵利物浦，上仗英聯盃決賽又吞曼聯雙蛋，嚟到今場作客曼城，當然亦出齊精兵，包括安東尼哥頓正選、尼克普比刑滿登場。
富豪對決，踢落都係曼城高，特別雙防中加四個攻擊球員，全部肯撲敢搶，攞到好大優勢，14分鐘已先開紀錄。科頓禁區邊突然爆發，4個紐卡素球員都擋唔住，畀佢窄位近門射成1:0。呢球亦係科頓近3場第4個入波，狀態弗爆。
下半場曼城壓迫力減弱，紐卡素搶番唔少攻勢，中段換入辛特麥斯明、阿歷山大伊沙克兩大前鋒，攻勢好番好多，製造幾次危險機會，但都未能把握。
紐記不斷錯失扳平機會，曼城一句唔該，67分鐘由貝拿度施華射成2:0。同樣係後備，貝拿度施華入場兩分鐘即建奇功，勝負分野由此而成。
之後紐卡素仍然有機會，但總係擺唔到個波入網，輸0:2完場。自從阿米朗狀態轉沉、未能延續場場入波走勢後，紐卡素太依靠單一進攻力量嘅弱點表露無遺，贏波難度大大增加，領隊賀維真係要諗諗辦法喇。
