始終都係要靠福仔！曼聯大除夕夜，作客1:0挫狼隊，拉舒福特後備登場，奠定勝局，令球隊升上第4位。
英超重開首仗，曼聯3:0大勝森林，由拉舒福特先開紀錄，佢今仗由於紀律問題先任後備，由馬迪爾做單箭頭，般奴費南迪斯、安東尼及新人王加拿祖支援。
狼隊趁世界盃期間，請咗前西維爾主帥盧柏迪古執教，上任首仗即憑補時入波，2:1險勝愛華頓，發揮新帥效應，今仗即使對曼聯，排陣亦非常主動進取，擺出迪亞高哥斯達、黃喜燦、普丹斯攻堅。
雖然要用勞基梳亞客串中堅，但肥梳非常稱職，同華拉尼合作，抵擋巳退化嘅迪亞高哥斯達，實在綽綽有餘，狼隊上半場欠缺有威脅攻勢；反而曼聯有兩個攻門，幾乎做成入球，狼隊全靠門將荷西沙亞力挽狂瀾。
加拿祖表現較沉，換邊後即被坦哈格換出，但拉舒福特入替，福仔的確弗到震，76分鐘接應般奴費南迪斯直傳，殺入禁區，即使畀幾個狼隊守將包圍，仍能自己搞掂，為曼聯射成1:0。
狼隊補時階段，有後備中鋒魯爾占美尼斯近門槌，極具威脅，但畀迪基亞反應超快救出，未能扳平，但盧柏迪古上任後首兩仗，隊波明顯有進步，以狼隊人腳，未來走勢仍可以睇好。
趁2022年最後一戰，曼聯升上第4位，16戰32分，較同場數熱刺多2分，比榜首阿仙奴落後8分。下周三凌晨對手係般尼茅夫，紅魔2有機會完成聖誕新年快車3連勝，繼續坐穩前4位置。
