'

【英超】福仔入波威盡5大聯賽!技安對水晶宮被逐 幸趕及關鍵大戰復出

曼聯、紐卡素喺英超3、4位爭持激烈,又一齊打入英格蘭聯賽盃決賽,去到最後高低分野,會唔會又係靠佢-拉舒福特呢?

第21輪英超賽事,紐卡素前鋒把握力依然不足,主場被韋斯咸逼和1比1;曼聯藉拉舒福特迫得12碼,由般奴費南迪斯先開紀錄,之後福仔自己再入波,主場2比1挫水晶宮,以42分升上第3位,領先紐卡素2分。

今仗係曼聯主場13連勝,而近13場賽事中,拉舒福特無可抵擋,射入11球,再加4個助攻,紀錄冠絕5大聯賽。可以話,自世界盃決賽周後,福仔已經徹底開竅。

去到賽事尾段,雙方球員有大衝突,場面混亂,卡斯米路因為叉對手頸,直接紅牌被逐,將罰停賽3場。上月對水晶宮,呢位巴西中場亦有黃牌,以致錯過之後對阿仙奴大戰,估唔到相隔不足一個月,再對水晶宮又被趕出場。

冇卡斯米路當然影響大,特別係目前曼聯中場缺人,不幸中之大幸,除咗沙比薩正慢慢融入,未來3場賽期,對手係兩對列斯聯及主場鬥李斯特城,對手唔算太強,而「技安」啱啱趕得切喺英聯盃決賽對紐卡素復出。

紐卡素主場對韋斯咸,開波40秒已入波,但睇過VAR後食詐胡,韋斯咸逃過一刧,門將開出自由球,又畀紐卡素即時反攻,中鋒哥林威爾遜單刀射成1比0。由開波至真正開紀錄,過程只有93秒,相當神奇。

雖然有夢幻開局,但紐卡素未能保住勝果,32分鐘被盧卡斯柏基達扳平,之後雖然製造大量攻勢,始終未能再領先,痛失兩分。

紐卡素近期經常贏形勢,但入波有困難,隊中欠缺射手,哥林威爾遜唔係呢種級數,季初加盟瑞典前鋒伊沙克,身價6300萬鎊破球會紀錄,但一直傷多過踢。

冬窗從愛華頓買入安東尼哥頓,對韋斯咸後備登場,尾段曾交靚波畀哥林威爾遜單刀,可惜起腳前被破壞。哥頓係好有潛質嘅英格蘭年輕翼鋒,但並非正中鋒類型,呢個問題唔改善,將影響紐卡素今季爭取更好成績。