【英超】神劇情!4:3激贏富咸 利物浦領先倒輸再反勝!4球靚波 遠藤航阿諾做英雄

點解利物浦係要贏得咁驚險?周日英超主場對富咸,兩度領先再反輸2:3後,完場前藉兩個遠射再反贏4:3,後備遠藤航成為反勝關鍵,真正贏波英雄!

利物浦正選龍門艾歷臣比加養傷,12月大部分時間會由後備門將基拿靴把關。主場對富咸正路夠殺,但中後場欠穩問題,令紅軍上半場踢得好辛苦,兩度領先都被追和。

右後衞亞歷山大阿諾22分鐘罰球得手,利物浦先開紀錄,但25分鐘富咸由哈利威爾遜披平,雖然阿歷斯麥卡里士打38分鐘射出世界波,助利物浦再領先2:1,但去到補時,又被富咸藉角球攻勢做成門前混戰,由堅尼泰迪追和2:2。

下半場利物浦提升進攻速度,的確有好多埋門機會,但前鋒真係唔順Q,達雲紐尼斯射中楣加門前失機,今季已5次中門楣門柱,成為英超黑仔王,未能助利物浦再度領先,反而喺80分鐘輸多球,由卜比列特接應左路傳中頂入。

列特助富咸一度領先

以為利物浦瓜得,好在有救星出現:遠藤航!日本國腳83分鐘入場,87分鐘以一個精彩遠射扳平3:3。1分鐘之後,利物浦再狂攻,阿諾去到對手左路助攻,射入一個中距離波,令紅軍又再反先,戲劇性全取3分,擁躉再一次享受過山車式勝利。

車路士估佢唔到,成個下半場打少個,主場仍以3:2挫白禮頓。安素費南迪斯、高維爾為主隊射成2:0;華倫迪43分鐘替白禮頓追成1:2,加上車路士中場干拿加歷查完半場被逐,以為海鷗有機,但班波周中踢完歐霸冇乜力,未能追和之餘,仲畀安素費南迪斯藉12碼射成3:1。雖然三笘薰後備登場亦無補於事,只能由祖奧柏度完場前追成2:3。