'

【英超】祖奧菲歷斯救火唔成 首戰即領紅牌!車路士輸埋畀富咸 唔換帥冇得搞?

畀1.5億港紙馬體會,借用祖奧菲歷斯半年,但呢位葡萄牙國腳首度英超上陣,即領紅牌被逐出場,令車路士作客1:2負富咸。好多球迷都忍唔住問:車仔點先搞得番起?

其實表現唔差,球員亦賣力,可惜就係輸多場,車路士近10戰繼續只得1勝,其餘6負3和。喺買人都未能改變局面嘅情況下,雖然哥迪奥拿呼籲畀樸達多啲時間,唔好再換帥,但美國班主保利,仲有冇咁好耐性先?

祖奧菲歷斯今場做救火大隊長,即借即用,首度登場,原本表現的確唔錯,發揮速度同突破力,同夏維斯算有良好配合,一開波即落底傳中,交畀新拍檔近射,但畀對手閂出,幾乎有一個夢幻開局。

上半場菲歷斯有兩次射門機會,但未能把握,反而富咸突擊更具威脅,23分鐘卜比列特射中楣,2分鐘後,前車路士中場韋利安為主隊先開紀錄。

換邊後只有2分鐘,美臣蒙特罰球射中柱,中堅高列巴尼補中扳平。車路士士氣大振,但原來黑氣未除,先有中場薩卡利亞受傷,即時被換走,而且睇落傷勢唔輕,隨時又多一件傷兵。

更大鑊出現於58分鐘,祖奧菲歷斯一直表現唔錯,但攔截時鞋底去先,危險動作,第一場英超即領紅牌,將會停賽3場,領隊樸達睇到擰晒頭,心諗唔係黑到咁呀嘛!

車仔打少個,當然被動,攞番1分當贏,但守唔到幾耐,72分鐘,富咸中鋒卡路士雲尼斯奧斯頭槌頂成2:1,門將阿列沙巴利加失晒位,要負上部分責任。

車路士再輸後,18戰25分排第10位,周日晚返主場對水晶宮,會唔會有反彈演出?但無論如何,車仔今季耗資巨大,但卻換嚟目前位置,肯定已經係大災難。