國際賽後，好波真係一浪接一浪，早場阿仙奴3:1擊敗熱刺已經精彩，之後利物浦大戰白禮頓更加係激到爆，利迷來回地獄又折返人間再返地獄，多多救心都搞唔掂，但冇得傾，白禮頓今季表現出色，即使賣埋教頭一樣掂，杜沙特大演帽子戲法，仲要3球都有一定功架，利物浦執番1分都算係咁。
利物浦半留力出戰，左閘用森美卡斯，小將法比奧卡維奴擔正，達雲紐尼斯同路爾斯戴亞斯先列後備，好在中場總算回復完整，艾簡達拿、法賓奴同神軒正選，不過踢落好似唔多對路。
開波僅3分幾鐘，杜沙特就喺禁區內扣過對手，送個波入網，利物浦眾將如夢初醒，但可惜入局太慢，17分鐘，防線炸彈阿諾又出事，喺後場被韋碧克頂走個波，再爆落去傳中，經過兩腳美妙組織，杜沙特再一次冷靜地射遠柱建功。
去到33分鐘，費明奴接應沙拿靚傳撞射得手，追成1:2。下半場，高普不敢怠慢，換番戴亞斯入嚟，威脅力即時大好多，54分鐘，戴亞斯邊路發難，再傳入中間，費明奴神乎其技咁扣兩嘢再起腳，追成2:2！
9分鐘後，利迷再一次感受絕地反勝喜悅，阿諾開角球，白禮頓門將羅拔辛捷士出迎失誤，個波彈中韋斯伯特再彈入網，利物浦反勝3:2，以為可以控制戰局到完場，但白禮頓堅真材實料，繼續搶攻盡砌，去到84分鐘，日本國腳三笘薰傳中，VVD漏踢，造就杜沙特連中三元，追成3:3完場。
白禮頓新帥迪薩比係意大利人，之前將薩斯索羅改造成逼搶黑馬，之後去薩克達，而今場加盟白禮頓嘅第一擊，6次埋門6次中目標入3球，箭無虛發，贏盡口碑。
至於大演帽子戲法嘅杜沙特，今季已經入咗5球，係比利時翼鋒，早前都有份踢歐國聯，相信下個月嘅世界盃，都會見到佢嘅身影。
同晚賽事，白禮頓前主帥樸達帶領嘅車路士，憑奧巴美揚追平、倒戈嘅干拿加歷查絕殺，以2:1反勝水晶宮。
