三球王勁到癲！周六英超白禮頓主場1比0險勝般尼茅夫，三笘薰再度於完場前絕殺對手，今次仲係用頭槌，冇得唔佩服！
自世界盃後，三球王於英超大放光芒，近3仗都有波入，先係對李斯特城，喺左路推進，突然切入中路，起右腳射入世界波；上仗英足盃對利物浦，完場前施展連環三腳，以一個藝術品入球絶殺紅軍。
嚟到尋晚對般尼茅夫，白禮頓陷入苦戰，一直搵唔到入波機會，直到87分鐘，藉隊友左路傳中，身材矮小嘅三笘薰突然殺入禁區，搶前柱頭槌破網，白禮頓險勝1比0，繼續守住第6位。
除絶殺外，三球王今仗依然係白禮頓攻勢泉源，左路多次以速度、盤扭製造威脅。全場比賽，佢有3次射門2次射正，傳球成功率85%，8次對抗5次成功，數據咁靚仔，自然當選今仗最佳球員。
自踏入2023年，三笘薰成為歐洲聯賽之中，最搶眼嘅亞洲球員，近7仗為白禮頓貢獻5入球1助攻；今季出場19次，共有6球4助攻，交出華麗數據。孫興民持續不振，似由高峰期滑落之勢，三笘薰如保持目前水準，勢必成為新亞洲一哥。
白禮頓領隊沙比薩，賽後極力稱讚愛將，仲許下神級承諾：「三笘薰係一個好偉大嘅球員，關鍵係佢媽媽！因為三笘遺傳咗一種天賦嘅特別才能……其實佢今場唔係特別出色，但我永遠唔會換走佢，因為只要佢在陣，佢就任何時刻都有機會突然入波！」
想睇三球王，要等到下周六，白禮頓將作客水晶宮。
