【英超】真心愛紅魔!拉傑夫入主 全面揸莊 曼迷超期待;換血勢必實行 般奴冇運行?

聖誕快「落」?曼聯喺平安夜正式官宣,英國富豪拉傑夫(Sir Jim Ratcliffe)嘅英力士集團,成功以12.5億鎊收購球會25%股權,由於拉傑夫早已喺自傳透露過對曼聯球員嘅睇法,佢入主紅魔後,勢必令球會掀起翻天覆地嘅改變!

71歲嘅拉傑夫除咗會入股曼聯,仲承諾注資3億美元,作為未來對奧脫福球場重建嘅投資。作為交易條件之一,拉傑夫會全面負責營運球會所有嘅足球業務,亦即無論男足、女足以至各梯隊青年軍,都會由佢打晒骰。

拉傑夫喺官方聲明話自己喺曼徹斯特成長,終身都係曼聯球迷:「好開心好榮幸!終於同曼聯董事會達成協議,並且佢哋會將足球營運嘅管理責任交畀我哋。」

「雖然球會喺商業上面係好成功,確保有足夠資金去競逐各種榮譽,但係呢個潛力近年未能夠完全釋放!我哋會引入全球有專業知識嘅人才,幫助推動球會改進,同時亦會提供資金畀奧脫福發展。」

睇見拉傑夫咁雄心勃勃,加上佢係真心愛曼聯,唔少曼迷都對佢嘅入主同改革充滿期待。不過有人歡喜有人愁,拉傑夫入主勢必換血,曾經被新老細批評為懦弱嘅隊長般奴費南迪斯,怕且都冇乜運行。

除咗般奴,英國《太陽報》亦列出其餘6位高危人士,包括球會史上第二高轉會費但冇貨交嘅安東尼、冇紀律嘅辛祖、英雄遲暮嘅卡斯美路及華拉尼、表現不穩嘅奧拿拿及麥佳亞。

同時,盛傳曼聯足球董事會內,拉傑夫麾下嘅英力士集團會有兩席,其中一人會係法國名將及球會名宿白蘭斯(Jean-Claude Blanc)。白蘭斯曾經做過祖雲達斯同巴黎聖日耳門嘅CEO,無論管理經驗同個人魅力,都足夠震住更衣室一班大帝。