曼城重返勝軌，周六英超主場2:1險勝白禮頓，超越死敵曼聯，創造一項新紀錄。三笘薰剛大幅加薪續約，亦送出一個招牌助攻，但未能扭轉球隊近3戰不勝困局。
今仗係曼城各項賽事，主場21連勝，創造英超球隊新猷。曼聯曾經係保持紀錄者，2010-2011年度做出主場20連勝。
曼城由夏蘭特踢9號位，配合杜古、菲爾科頓、祖利安艾華利斯攻堅。，更重要係洛迪卡斯簡迪停賽復出，曼城對上兩場聯賽輸晒，正係佢坐波監之時，防中大將一出手，果然令球隊重上勝軌。
藍月亮上半場有夢幻開局，7分鐘，表現突出嘅比利時國腳、新扭波王杜古，從左路殺入禁區傳中，艾華利斯輕鬆射成1:0。19分鐘，貝拿度施華喺前場搶贏控球權，交畀夏蘭特，挪威神鋒從禁區外勁射破網，藍月亮半場領2:0。
三笘薰賽前宣布續約白禮頓至2027年，周薪由1萬鎊激增至8萬鎊；今仗佢有得有失，曾錯失兩次入球機，但球會追近紀錄一球，仍然作出極大貢獻。戰至73分鐘，三笘薰擺脫卡爾獲加後傳中，阿簡治未能解圍，法迪把握機會射入，白禮頓追回一球。
曼城下半場明顯跌watt，哥迪奧拿又遲遲唔換人，形勢相當危急，尾段更有阿簡治被逐，但仍力保勝局，以2:1全取3分，9場得21分，憑得失球差力壓同晚和波失分嘅阿仙奴，暫時升上榜首。
至於尋晚其他英超，紐卡素主場炒水晶宮4:0，賓福特則以3:0大勝到訪的般尼，般尼茅夫被作客的狼隊反勝2:1，諾定咸森林主場與盧頓踢成2:2。
