阿仙奴奇兵加奇招制勝！周一凌晨英超聯賽，阿仙奴作客1:0力挫愛華頓，相隔6年，終於再喺葛迪遜公園球場贏波。
全取3分後，阿仙奴5戰13分，與利物浦、熱刺同分，繼續力逼榜首曼城（15分）。佢哋上一次作客贏愛華頓，原來已經係2017年，當時仍然由雲格執教。今仗兵工廠雖然佔盡優勢，有76%控球率，但仍然要憑奇兵加奇招，先可以撕破愛華頓死守防線。
奇兵當然講緊托沙，上半場呢位比利時國腳入替受傷嘅加比爾馬天利尼，戰至69分鐘，佢配合隊友短角球戰術，禁區右路乖巧射遠柱入網，取得全場唯一入球。
呢位比利時射手，上季季中由白禮頓轉投阿仙奴。其實阿仙奴一直心儀梅迪歷，可惜不敵車路士銀彈，而托沙只係次選，由於薩卡仔、小天馬實在太弗，托沙正選次數不多，而佢上次於英超有波入，已經係今年2月11號對賓福特嘅事，足足相隔219日。
奇招則來自角球戰術。面對愛華頓高佬陣，阿仙奴開出角球後，經過6腳傳波，先至由托沙接應射入。唔單止咁，講波叻過踢波嘅加利佬指，呢個角球戰術耗時26秒，而且阿仙奴今場每次開角球，都會拖一陣先開出，除咗主隊球迷鼓噪，球證亦幾乎要畀黃牌咁滯。
踢過晒阿仙奴同愛華頓嘅禾確特話，阿迪達呢個「揼波鐘」角球戰術，預期會有唔少球隊効法，因為用短角球組織，相對容易撕破對手密集，最重要係敵軍喺等候期間容易鬆懈，開波後跟唔返節奏而失位，有利進攻球隊。
