【英超】相隔101年 紐卡素3連殺紅魔;全場得1次中框 曼聯堅曳 作客前8球隊 兩年未贏過!

周六英超尾場,曼聯喺全場只有一次射門中框情況之下,作客以0:1落敗,連續3次不敵紐卡素。自1972年以來,紐卡素終於喺聯賽對曼聯獲得連勝;上一次各項賽事對紅魔出現3連勝,已經係1922年,足足101年之前嘅事!

領隊坦哈格今次有個幾好嘅藉口,曼聯大軍原定朝早11點乘坐飛機出發,征戰東北部嘅紐卡素,但當10點去到機場嗰陣,因為天氣及技術問題,航班已被取消。坦哈格同班球員,唯有改坐隊巴,用咗足足3粒鐘,先由曼徹斯特去到紐卡素主場聖占士公園。若然坐飛機的話,半粒鐘搞掂。

曼聯用咗8000萬鎊轉會費買返嚟嘅中鋒海倫,喺英超仲未開齋,今仗先任後備,由馬迪爾頂上;梳爾移入中路做左中堅,而紐卡素傷兵滿營,正選陣容同周中歐聯一樣,三叉戟仍然係阿米朗、伊沙克、安東尼哥頓。

雖然傷兵多,不過紐卡素依然控制大局,上場聯賽射入倒掛金球嘅加拿祖,喺上半場左邊禁區起腳,已經係曼聯全場唯一中框嘅攻門。去到55分鐘,紐記終於入波,捷比亞傳中,哥頓仔遠柱撞入,最終紐卡素以1:0小勝紅魔。賽後紐卡素以14戰26分升上第5位,壓過熱刺及曼聯,曼聯落後2分排第7。

曼聯今場又輸,延續咗兩個差勁嘅數據,首先係今季未贏過前6名球隊,同時自兩年前10月以來(當時由蘇斯克查領軍),未試過喺聯賽作客擊敗排前8嘅隊伍,戰績3和10負。

坦克稱有計劃反彈。

領隊坦哈格賽後面對記者提問,被問到上述問題,坦哈格話:「我一路等緊你問呢條問題,因為你哋記者嘅職責,就係搵問題。放心,我哋已經有晒計劃,會繼續努力。」曼聯會先喺周中快車主場迎戰車路士,周末鬥般尼茅夫,然後下周中鬥拜仁,上演歐聯生死戰。