韋斯咸周六凌晨作客2:1贏盧頓，踢出3連勝超強氣勢，又再升上英超榜首。
開鑼戰賽和般尼茅夫之後，韋斯咸連勝車路士、白禮頓，加埋今仗再挫盧頓，仍然保持不敗金身，3勝1和得9分，暫以1分領先少打1場嘅曼城。今輪完結後進入國際賽期，9月16號重開時，韋斯咸就會主場對曼城。
韋斯咸今個夏天收取1.05億鎊，將中場靈魂迪勤懷斯賣畀阿仙奴，當時好多人認為韋斯咸冇咗呢位大將，勢必如上季一樣深陷降班危機；但佢哋將懷斯大筆轉會費用得其所，然後再補充禾特包斯，完美取代懷斯。
前線查洛保雲、米查利安東尼奧，一如既往打突擊威脅性極大；由修咸頓轉會嘅「死球專家」禾特包斯，更係季初表現最好中場之一，都係韋斯咸取得佳績原因。
盧頓今季重返英超，之前3輪因有118年歷史嘅簡尼禾夫路球場不合規格，需要進行加建工程，直至今仗才舉行該會英超地標戰。
憑藉主場氣勢，盧頓在上半場多次攻門，可惜未能先開紀錄。韋斯咸站穩陣腳後，37分鐘，柏基達傳中，查洛保雲遠柱頭槌先開紀錄。保雲承接上季尾氣勢，季初弗到爆炸，已經有3個入球。
雖然韋斯咸51分鐘食詐糊，但85分鐘終於奠定勝局，又係禾特包斯開角球，葛特蘇馬門前無人看管下頂入。盧頓補時由麥斯安達臣破蛋，取得英超首球，惟依然開季4連敗，同少踢1場、周六晚至有比賽嘅般尼、錫菲聯、愛華頓，都係零分球隊。
