車路士來季將會由前熱刺主帥普捷天奴執教，所謂新人事新作風，加上車仔目前嘅人腳，絕對足夠分3隊嚟踢，但又唔使踢歐戰，冗員充斥、大清洗在所難免。
季中以一億歐元來投嘅烏克蘭國腳梅迪歷，上季總共上陣17次，僅交出0入球2個助攻嘅肉酸數據，表現同身價嚴重不符，甚至有消息指，普捷天奴未上任，就已經冇打算重用佢，好彩，只得22歲仔梅迪歷好有鬥志，佢冇打算放棄，並不停逼迫自己，希望盡快操起狀態。
梅迪歷早已成為大國腳，日前佢為烏克蘭披甲，喺熱身賽表現唔曳，期間佢仲有球射門，令到德國皇馬中堅魯迪格擺烏龍，協助烏克蘭作客德國踢成3:3。
嚟緊呢個國際賽期，烏克蘭會喺歐國盃外圍賽對北馬其頓同馬爾他，預計梅迪歷都會係必然正選。
呢兩場歐國外完咗之後，今個國際賽期亦告完結，大部份球員會放假叉叉電，不過梅迪歷啱啱相反，佢早前請纓希望為國出戰U21歐國盃，馬不停蹄咁以比賽操起狀態，如果一路踢到入7月9號決賽的話，梅迪歷嘅假期就會只剩大約3個星期。
烏克蘭U21喺歐國盃列入B組，同組對手有西班牙U21、克羅地亞U21及羅馬尼亞U21。梅迪歷雖然上車後表現一般，但單睇波底的話，佢踢U21無疑係大超班，絕對有助佢提升信心同埋狀態。
