紐卡素上Top 3 ，幾耐未見過？多得熱刺後防送大禮，主場1:2負利物浦，令作客4:1大勝修咸頓嘅紐卡素，取而代之進佔第3，進一步挑戰下季歐聯席位。
熱刺、利物浦都有主力前鋒養傷，未知幾時復出，利物浦係祖達同路爾斯戴亞斯，但仲有沙拿、法明奴、達雲紐尼斯；熱剌更大鑊，李察利臣加埋孫興民都要休戰，古路施夫斯基雖然傷癒但先列後備，今仗只得哈利卡尼做單箭頭，後上支援嘅係比列錫。
利物浦三箭頭發揮唔錯，某種程度係熱刺後防唔掂所致。開波11分鐘，熱刺禁區近7個人，利物浦只有3丁友，都阻唔到達雲紐尼斯交畀沙拿近門射入。
40分鐘，中堅艾歷迪亞頭槌回傳，錯到離晒譜，益咗沙拿單刀射成2:0。艾歷迪亞2014年加盟熱刺，連埋今球，有7次失誤導致直接輸波，當中有4球都係送畀利物浦，真正係紅軍好朋友。
下半場熱刺熱血反攻，利物浦防線都有蝦碌嘢，加上熱刺決心爆燈，令紅軍一路被圍攻，直到古路施夫斯基後備出場，70分傳交予哈利卡尼禁區內快射成1:2，之後繼續狂攻，可惜硬係爭少少，最終利物浦守到完場，經連輸畀森林、列斯聯兩支護級隊後，終於贏番場英超，打番支強心針。
熱刺輸波後，第3位終於不保，事關紐卡素作客4:1大勝修咸頓，9場不敗加4連勝，強勢殺上三甲。米基爾阿米朗繼續有波入，般奴古馬雷斯除咗入波，亦依舊主宰中場。
近7輪英超，紐卡素有4場士哥達4球或以上，火力驚人，佢哋絕對係近兩個月狀態最弗嘅球隊。紐記對上一次輸波，已經要數到9月1號對利物浦。
最新前列形勢，阿仙奴13戰34分、曼城13戰32分、紐卡素14戰27分、熱刺14戰26分、曼聯13戰23分。
