曼聯主場1:2負白禮頓，爆出開季最大冷門。賽後大家全力批評曼聯點渣法、後防點廢法，但唔好忘記，有個白禮頓球員好抵讚，佢就係前「紅魔」韋碧克。
雖然冇入波，但打單箭頭嘅韋碧克，憑強力衝剌同不斷走位，令曼聯中堅麥佳亞、利辛度馬天尼斯極為狼狽，亦造就隊友柏斯高哥斯梅開二度。單以呢場睇，韋碧克表現的確遠勝任何一個曼聯攻擊球員。
韋碧克同隊友嘅精彩演出，令坦哈格成為繼另一荷蘭主帥尹戈爾後，另一位上任後首場英超即輸嘅曼聯領隊。
樸達大讚韋碧克，仲爆出賽前一件事，「韋碧克今場表現真係無與倫比，佢帶住無比決心，要將曼聯打敗。其實賽前幾日，佢胃痛到飛起，但我知道，冇嘢可以阻止佢喺呢場波上陣。即使要孭住個厠所，佢都會上。」
韋碧克曼聯青訓出身，2008年升上一隊，曾經係正選前鋒，前途光明，但一直被批評欠缺鬥心，位置始終坐唔穩，最慘係佢傷患纏身，只能黯然離開曼聯。之後輾轉流離阿仙奴、屈福特、白禮頓。
已經31歲，足球生命無多，韋碧克的起心肝，要喺足球生命最後時光發放能量。今個夏天，佢進行艱苦特訓，重點係瘋狂舉鐵。苦練見成績，原本單薄身材，開鑼前變成鐵甲坦克，令白禮頓球迷都大呼神奇。呢個改變喺對曼聯時，已經顯露無遺，依家嘅韋碧克，好力又猛火，佢用行動證明，即使已遠離大球會，只要踢好波，始終會得到掌聲。
