【英超】界外傳中爭議 慘吞韋斯咸雙蛋;阿仙奴痛失榜首 阿迪達:我都冇晒計

周四英超,阿仙奴喺主場倒灶,以0:2不敵倫敦同市對手韋斯咸,錯失重登榜首嘅機會,今場主角之一又係VAR,韋斯咸先開紀錄嗰球疑似早已出界,不過因鏡頭被遮住而無法確認,最終維持入球原判……

夏維斯停賽,阿仙奴今場用托沙頂替佢,同倒戈嘅迪勤懷斯及隊長奧迪加特合作,孭起中場線。陣式較進取、加上主場及質素較高,阿仙奴控球率超過8成,不過去到13分鐘出事,查洛保雲喺底線傳中,蘇錫克撞入。

肉眼所見,傳中時個波已疑似已經出界,但底線攝影機角度咁啱被保雲大腿遮住,交由VAR長時間審核後,喺未能完全確定誤判下,最終判入球有效。

阿仙奴輸波,鋒線亦絕對需要負上責任,全場30次攻門都無功而還,係薩卡射中柱最近磅,而韋斯咸攻勢唔多,但把握力極高,55分鐘由倒戈嘅馬夫洛柏路斯接應角球、頂成2比0;如果唔係賓華馬完場前12碼宴客,韋斯咸更可爆大冷贏夠3蛋。

阿仙奴0:2落敗後,錯失重返榜首嘅機會,目前19戰40分,以兩分落後畀利物浦,相反韋斯咸則相當威水,喺聖誕快車期連贏曼聯及阿仙奴,強勢升上第6位,落後第4嘅曼城4分。

上個月0:1輸畀紐卡素,VAR同樣以「未能作結論」為由,判韋洛克嘅「界外助攻」合法,連續兩個月做VAR苦主,阿迪達就話:「球證話冇確定嘅結論都冇計,不過好遺憾,以我哋依家嘅科技,竟然幫助唔到呢啲爭議判決,冇辦法。」

當然,阿仙奴輸波唔怪得晒VAR,佢哋埋門一腳真係好差,隊長奧迪加特亦將責任攬上身:「今日真係令球迷好失望,我哋完全控制大局,製造咗足夠嘅機會,但埋門處理太曳,呢個係我哋嘅責任。」