時隔23年，諾定咸森林再得到英格蘭頂級聯賽勝仗，贏波英雄首選甸恩軒達臣，此子亦成就個人足球生涯中最難忘勝仗。
森林重返英超，主場1:0擊敗韋斯咸，深具歷史意義，首席功臣係甸恩軒達臣，佢除咗救出12碼，亦貢獻一個神救。森林季前大事擴軍，買入多名球員，轉會費近一億鎊。但最精明交易，相信係從曼聯借用甸恩軒達臣。
就喺森林贏韋斯咸前不足24小時，曼聯大敗畀賓福特，迪基亞孭晒鑊，唔少紅魔躉埋怨，球會唔應該借走甸恩軒達臣。
但其實好難唔借走佢，因為喺上季季前，甸恩軒達臣獲會方承諾會代替迪基亞，擔任首席門將，點知球會出爾反爾，甸軒繼續後備之餘，更被推晒啲借用邀請。甸軒就咁浪費咗一季足球生命。由於甸軒離隊意志堅定，但曼聯又唔想畀優質門神永久轉會，所以喺坦哈格入主曼聯後，領導層已基本同甸軒達成協議，可以將佢外借一季。
到坦哈格開操後，甸軒承認刻意避開新帥：「我係特登避開佢，唔想畀佢睇到我練波，因為一旦畀佢睇到，我相信佢會諗方法留我。」
好龍門最緊要有自信，甸軒真係夠晒，轉會決心之強，亦睇到佢對比賽係幾咁饑渴。「我同坦哈格一句説話都冇講過。唔係我唔鍾意佢，而係我唔可以畀外借出現變數，冇任何接觸就最安全。」
連加特亦係由曼聯轉投森林，但開季表現唔算特別標青，佢前季外借韋斯咸踢到曉飛，但今次面對舊主，就引起韋斯咸躉不滿，認為佢為咗高薪揀森林，有球迷仲掟啲細面額銀紙入場串佢貪錢，冇計，因為愛嘅反面就係恨嘛。
