周日英超重頭戲，利物浦作客2:3不敵阿仙奴，雖然中間有啲爭議判決，但整體阿仙奴的確踢得有水準。紅軍上半場所失兩球，某程度上輸在阿歷山大阿諾特防守曳，下輪仲要對曼城，怕且高普唔係要諗贏波，而係點樣減少失球。
大戰當前，雙方都出最強陣容，利物浦4231主攻陣式，繼續信任達雲紐尼斯做單箭頭，沙拿、祖達、路爾斯戴亞斯從後支援。
右閘亞歷山大阿諾特被嚴厲批評後，上仗對前鋒乏力嘅格流，防守似有所改善，但原來只係假象，今仗一開波又未瞓醒，企喺度睇波唔轉身回防，畀加比爾馬天尼利從後插入空位射入，阿仙奴開波1分鐘，閃電打開紀錄。
利物浦展開反撲，路爾斯戴亞斯、沙拿左右輪流進襲，令阿仙奴防線亦出現甩漏。34分鐘，中堅馬加希斯解圍失誤，路爾斯戴亞斯落底傳出靚波，達雲紐尼斯跟上剷入，利物浦扳平。之後路爾斯戴亞斯傷出，由法明奴入替。
上半場共5分鐘補時，到補時4分鐘仲有波入，利物浦獲得自由球，呢個時間依然谷得好上，啱晒阿仙奴打反擊，馬天尼利又喺利物浦右路放題，再送遠柱由布卡約沙卡射入空門，半場領先2:1。
高普因持續重用阿諾，受到極大抨擊，下半場開波佢冇再堅持，以祖高美斯入替上半場曾經受傷嘅阿諾。
53分鐘，利物浦再度扳平，入球係腳風奇順嘅法明奴，佢近5場英超入6球，但6球已經係紅軍首席射手，守固然唔穩，攻力亦疲弱，成績當然低落。
阿仙奴之後展開瘋狂進攻模式，利物浦希望以守為攻，用法賓奴入替沙拿，打多個防守中場。但阿仙奴攻勢快而直接，紅軍終於頂唔住，76分鐘艾簡達拿禁區內踢中加比爾捷西斯，阿仙奴獲得12碼，布卡約沙卡射成3:2完場，9戰24分重上榜首，領先曼城1分。
利物浦球員今場鬥志有改善，但礙於對手真係狀態弗爆，富安健洋、沙列巴、以至格列沙加、耶穌仔同薩卡等等，全部交出高水準表現，利物浦最終失晒3分，目前8戰只得10分，同榜首相差14分，依家紅軍唔會再諗爭標，而係點樣令球員回復信心及鬥心。
利物浦下場英超嘅對手係曼城，如果條防線仲係咁嘅水準，真係唔知會失幾多球嘞。
