利物浦開季3戰未開齋，喺般尼茅夫身上發洩，周六英超主場大勝9:0，宣示紅軍正式展開新球季！更令紅軍迷興奮，係之前被全面抨擊嘅法明奴，藉對弱旅完全復活，做好文拿原有角色，31分鐘內完成助攻帽子戲法同入波，堅爭氣。
上仗被曼聯技術性擊倒，外界質疑利物浦問題更多，特別係法明奴，更受全面批判，指佢令利物浦中前場欠缺聯繫。
攞出表現，係反擊質疑最佳方法，利物浦開波即狂搶，精神狀態比起對曼聯，不知醒咗幾多倍。開波3分鐘，法明奴助攻，路爾斯戴亞斯入波，展開大勝序幕，上半場已入5球，將般尼茅夫徹底輾碎。
法明奴全場貢獻2個入球、3次助攻，掃走晒霉氣，路爾斯戴亞斯亦梅開二度，哈維艾利洛、阿歷山大阿諾特、雲迪積克、法比奧卡維奴各入一球，仲有1球係烏龍波，湊成9:0大勝，平英超最大勝仗紀錄。
利物浦及時打開今季勝利之門，有番晒信心，周四凌晨主場惡鬥紐卡素，係周中快車必睇大戰。
般尼茅夫的確慘，開鑼2:0贏咗維拉，之後連對曼城、阿仙奴、利物浦，被狂入16球，睇吓周四凌晨主場對狼隊可唔可以反彈喇！
同晚曼城亦以4:2反勝水晶宮，夏蘭特大演帽子戲法，今季4場聯賽入6球，夠晒威水！
